Gikatakdang ipahigayon ang regional launching sa Brigada Eskwela sa mga pampublikong tulunghaan sa Zamboanga Peninsula, isip kabahin sa pagpangandam alang sa umaabot nga pagbukas sa school year 2026- 2027 karong Hunyo 4, 2026.
Matod ni DEPED 9 Regional Information Officer Dahlia Paragas, ang maong kalihukan nagpakita sa spirit of “volunteerism” nga pasiugdahan DEPED Region 9, uban sa partisipasyon sa mga magtutudlo, ginikanan, estudyante, mga volunteers gikan sa nagkalain-laing sektor.
Gilauman usab nga motambong ang mga lokal nga opisyal, partner agencies ug pribadong sektor aron ipakita ang suporta sa programa nga nagpalig-on sa espiritu sa bayanihan ug panaghiusa aron masiguro nga andam ug luwas ang mga tulunghaan alang sa mga estudyante.
Dugang sa DepEd 9, dako ang papel sa Brigada Eskwela sa paghimo og maayong palibot sa pagkat-on ilabina karon nga nagpadayon ang pagpangandam sa kalidad nga edukasyon alang sa mga kabatan-onan sa Zamboanga Peninsula.
Ang Regional Launching sa Brigada Eskwela, usa usab ka higayon aron mapalig-on ang kooperasyon tali sa eskwelahan ug komunidad alang sa kaayohan sa mga magtutungha sa tanang pampublikong tulunghaan.
