Ana-a sa 42 ka mga kadete sa Philippine National Police Academy o PNPA, ang gitaktak sa pwesto human nalambigit sa kontrobersyal nga hazing incident nga nakapasamad sa 22 ka mga plebo o bag-ong kadete.
Sumala ni DILG Sec. Jonvic Remulla, nasayran nga mitan-aw lamang ug nagpabiling hilom ang mga gipalagpot nga kadete atol sa ginahimong pagbubo sa kombinasyon sa muriatic acid ug drain cleaning chemical sa lawas sulod sa barracks sa PNPA niadtong Abril 3 sa Silang, Cavite.
Matod pa sa kalihim, ang pagdumili sa mga kadete nga motestigo ug mosulti sa kamatuoran giisip nga usa ka matang sa pagkadili matinud-anon nga maoy hinungdan sa ilang pag-expel gikan sa akademiya.
Samtang, pito ka mga kadete ug duha ka mga pulis ang giatubang karon og kasong kriminal tungod sa paglapas sa Republic Act No. 11053 nga may kalabotan sa maong insidente.
Aron malikayan ang susamang hitabo, nagpatuman na og bag-ong mga polisiya ang PNPA lakip na ang pagdili sa mga upperclassmen nga makasulod sa barracks sa mga junior cadets panahon sa kagabhion ug pagbutang og mga guwardiya aron magbantay sa ilang seguridad.
Photo Courtesy: Philstar.com
