Gibutyag ni Representative Terry Ridon nga mokabat sa 215 ka miyembro sa Kamara de Representantes ang nagpahayag og suporta sa impeachment batok kang Vice President Sara Duterte.
Matod ni Ridon, pareho kini sa gidaghanon sa unang impeachment case batok sa Bise Presidente niadtong miaging tuig. Dugang pa niya, ang maong numero labaw sa duha ka bahin sa tibuok miyembro sa Kamara ug halos pareho sa resulta sa miaging impeachment plenary vote.
Una nang giingon ni Ronaldo Puno nga gibanabanaang adunay 180 ka kongresista nga posibleng mobotar pabor sa impeachment.
Ubos sa 1987 Constitution, igo na ang 1/3 sa House members o labing menos 106 ka boto aron mapasa ang impeachment ug mapadala sa Senado alang sa impeachment trial.
Ang tanang 318 ka miyembro sa Mababang Kapulungan sa Kongreso nakadawat na usab og kopya sa 93 ka panid nga Articles of Impeachment batok sa Bisi Presidente.
Base sa report sa House committee on justice nga gipangulohan ni Gerville Luistro, giakusahan si Sara Duterte sa giingong sayop nga paggamit sa 612.5 milyon pisos nga confidential funds ug ang dili mapasabot nga 6.77 bilyon pisos nga bahandi, lakip na ang uban pang mga alegasyon.
Nakalatid usab sa report sa komite nga ang mga akusasyon dili lang pinasahi nga mga insidente kundili bahin sa usa ka pattern sa giingong dili maayong pamatasan nga makadaot sa pagsalig sa publiko ug mahimong hulga sa nasud.
Samtang, sa bahin sa Senado, giingon ni Senator Francis Pangilinan nga iyang gihunahuna ang hanyag nga mahimong “impeachment manager” sa posibleng pagdungog. Matod ni pangilinan, kini susama sa usa ka clerk of court nga motan-aw sa proseso sa impeachment trial apan wala pa siyay pinal nga desisyon.
Photo courtesy: Rappler
