Nagkasabot ang Department of Social Welfare and Development (DSWD) ug ang mga Transport Network Companies (TNCs) sa pagpatuman og mas hapsay ug organisadong cash relief assistance pay-out alang sa mga drayber sa TNVS, MC taxi riders, service delivery riders, ug uban pang benepisyaryo nga wala pa nakadawat sa Fuel Subsidy.
Matod kang DSWD Assistant Secretary ug Spokesperson Irene Dumlao, ang mismong TNC na ang moasikaso sa pagpangita sa venue sa payout, pagtakda sa iskedyul, sistema sa distribusyon, ug pagpahibalo sa mga kwalipikadong benepisyaryo.
Tumong sa maong pamaagi nga malikayan ang kalibog, pagdoble sa ngalan, ug uban pang isyu sa listahan sa mga makadawat sa ayuda. Ang TNC usab ang mo-submit sa listahan sa mga drayber ug ilang plate numbers ngadto sa Land Transportation Franchising and Regulatory Board (LTFRB) alang sa beripikasyon.
Human sa pag-validate, ang DSWD ang manguna sa aktuwal nga payout sa designated centers base sa official masterlist aron masiguro nga tarong ug husto ang paghatag sa ayuda.
Sa karon, wala pa’y eksaktong petsa nga gipahibalo alang sa payout, apan posible kining sugdan sa Mayo 13, sumala sa DSWD.
Photo courtesy: themindanaolife
