Tingkagol na karon sa prisuhan ang giila nga Top 2 Most Wanted Person sa probinsya sa Surigao del Sur human kini nadakpan sa hiniusang pwersa sa kapulisan niadtong Mayo 5, 2026.
Ang suspek, nga nailhan sa alyas nga “Win2x”, nasikop sa iyang pinuy-anan sa Purok 4, Barangay Bogak, Lingig, bandang alas 10:30 sa buntag pinaagi sa usa ka koordinadong operasyon.
Ang pagdakop gipangulohan sa Surigao del Sur Police Provincial Office (SDSPPO) ubos sa pagdumala ni Provincial Director PCOL Jeffrey Lawrence D. Mauricio. Gihimo ang operasyon pinaagi sa gahum sa warrant of arrest nga gi-isyu niadtong Hulyo 1, 2024, sa Regional Trial Court (RTC) Branch 14-Family Court sa Bislig City.
Nag-atubang ang akusado og seryosong mga kaso, sa 2 counts of Qualified Rape of a Minor ug Acts of Lasciviousness (ubos sa Article 336 sa RPC kalabot sa R.A. 7610).
Tungod sa kabug-at sa maong mga krimen, walay piyansa nga girekomenda ang korte alang sa iyang temporaryong kagawasan. Kini nga kalamposan resulta sa pagtinabangay sa SDS PSOG, 1st Surigao del Sur PMFC, Lingig MPS, Bislig City Police Station, ug ang PNP Maritime Law Enforcement Team. Human mapahibalo ang iyang mga katungod, ang suspek gidala dayon sa Lingig Municipal Police Station alang sa saktong dokumentasyon ug disposisyon.
Photo courtesy- SDSPPO
