Nasakmit sa Police Regional Office 13 ang P7,000,000 nga kantidad sa smuggled nga sigarilyo, atol sa usa ka operasyon kagahapon sa buntag Mayo 7, 2026, sa Purok 3, Baylanon, Barangay Cahayagan, lungsod sa Carmen lalawigan sa Agusan Del Norte.
Sumala ni PBGEN Marcial Mariano P. Magistrado IV, Regional Director sa PRO13, daling niresponde ang Carmen Municipal Police Station human makadawat og report gikan sa usa ka concern citizen mahitungod sa gidudahang pagdiskarga og kargamento gikan sa usa ka pump boat.
Sa pag-abot sa mga operatiba sa maong dapit, ilang nadiskubrehan ang usa ka gibiyaan nga FUSO container van nga puno sa mga kontrabando. Lakip sa mga nakuha mao ang 90 ka karton sa Greenhills (puti),25 ka karton sa Cannon (puti), ug 40 ka karton sa Casablanca(pula).
Gawas sa mga sigarilyo, narekober usab ang usa ka Mitsubishi Canter truck ug usa ka KIA container van nga gituohang gigamit sa pagpamaligya ug pagbiyahe sa maong mga ilegal nga produkto.
Gipasidungan usab ni RD Magistrado IV ang kapulisan sa ilang paspas nga aksyon ug mipahimangno nga dili sila moundang sa paggukod sa mga nalambigit sa ilegal nga negosyo. Padayon karon ang imbestigasyon sa mga awtoridad aron mailhan ang mga tag-iya sa maong kargamento.
Photo courtesy- Police Regional Office13
