Aktibong niapil ang Department of Labor and Employment (DOLE) XII, ubos sa pamunoan ni OIC Regional Director Raymond Fel F. Sajor, sa unang Organizational Meeting sa Regional Trabaho Para sa Bayan–Inter-Agency Council (RTPB-IAC) XII niadtong Mayo 6, 2026.
Kini nga lakang nagpakita sa lig-on nga tinguha sa ahensya nga iduso ang Trabaho Para sa Bayan (TPB) Act pinaagi sa nagkahiusang mga programa ug serbisyo alang sa panarbaho.
Isip co-chair sa maong konseho, gipresentar ni OIC RD Sajor ang mga mahinungdanong inisyatiba sa DOLE nga nakalinya sa TPB framework, diin gihatagan niya og bili ang pagpalapad sa kahigayonan sa trabaho, pagpalig-on sa panginabuhian, ug pagpalambo sa kahanas sa mga trabahante sa tibuok rehiyon.
Gipasiugda usab sa maong panagtigom ang dako nga papel sa DOLE sa pagkab-ot sa inklusibong paglambo pinaagi sa pagmugna og mga trabaho ug pag-apil sa mga interbensyon sa labor market.
Gihisgotan usab ang mga plano sa trabaho sa konseho alang sa tuig 2026 ug ang mga estratehikong direksyon sa pagpatuman sa TPB Plan 2025–2034. Pinaagi niini, mas mapalig-on pa ang pagtinabangay sa nagkalain-laing ahensya sa gobyerno aron makahatag og malungtaron ug epektibong solusyon sa panarbaho alang sa tibuok SOCCSKSARGEN.
Photo Courtesy: DOLE SOCCSKSARGEN
