Nagpadayon ang gobyerno sa pagpalig-on sa suporta sa sektor sa edukasyon, human gipahibalo ni Education Secretary Sonny Angara, nga mokabat sa 2.4 milyon ka mga estudyante ang makabenepisyo sa subsidiya ilawom sa gilapdan nga programa sa assistance sa pribadong eskwelahan alang sa school year 2026-2027.
Sumala sa kalihim, lakip niini ang 1.47 milyon ka senior high school students nga sakop sa voucher program, samtang dul-an sa 990, 000 ka junior high school students ang matagaan og kahigayunan pinaagi sa educational service contracting program, aron makasulod sa pribadong eskwelahan ug mamenosan ang kabug-at sa gastohan sa mga ginikanan.
Gipasabot ni Angara nga prayoridad sa administrasyon ni Pangulong Ferdinand Marcos Jr., ang pagpagaan sa bayranan sa matrikula ug uban pang bayrunon sa eskwelahan, aron dili mo undang ang pag-eskwela sa kabataan tungod sa kakuwang sa kuwarta.
Samtang, gipahigayon usab ang “green lane” alang sa mga senior high school graduates sa job fairs nga gipasiugdahan sa Department of Education ug Department of Labor and Employment, aron mapaspasan ang ilang pagsulod sa trabaho.
Kapin sa 230,000 ka job opportunities ang giandam sa tibuok nasod, ug labaw sa 5,900 ka graduates ang nakadawat og libreng pre-employment documents sama sa NBI clearance, police clearance, ug birth certificate.
Ang maong inisyatiba kabahin sa implementasyon sa Republic Act 11261, nga nagtumong sa pagtabang sa kabatan-onan nga makapangita og trabaho ug makagawas sa kalisod sa kinabuhi.
Photo Courtesy: Philstar
