Posibleng mosaka ang presyo sa lana sa sunod semana sumala sa Department of Energy (DOE), tungod sa padayon nga paghuyang sa piso batok sa dolyar sa US. Si DOE Secretary Sharon Garin miingon nga base sa unang trend sa global oil trading, nagpakita kini og pagtaas bisan pa og pipila pa lang ka adlaw ang datos nga naobserbahan. Matod niya, nga padulong na sa pagsaka ang presyo, busa posible nga adunay oil price hike sa umaabot nga semana.
Sumala usab sa mga tinubdan sa industriya, gilauman ang laing round sa pagtaas sa presyo. Base sa duha ka adlaw nga trading sa Mean of Platts Singapore (MOPS), ang presyo sa diesel mahimong mosaka og mga ₱1 hangtod ₱3 kada litro, samtang ang gasolina posibleng mosaka og ₱1 hangtod ₱2 kada litro.
Ang DOE nagpadayon sa pagmonitor sa kalihokan sa global oil market ug maghulat pa sa final nga resulta sa trading karong Biyernes aron makumpirma ang eksaktong adjustment sa presyo. Kasagaran, ang mga kompanya sa lana mag-anunsyo sa price changes matag Lunes, ug ipatuman kini sa mosunod nga adlaw.
