Gipaniguro sa Malacañang niadtong Lunes Abril 27 nga ang mga ahensya sa gobyerno nagpadayon na sa mga lakang aron malikayan o mapaminusan ang epekto sa gilauman nga pag-abot sa El Niño, nga mahimong magdala og ubos sa normal nga ulan ug taas nga hulaw sa pipila ka bahin sa nasud.
Sumala ni Palace Press Officer Claire Castro, nagpadayon na ang mga pagpangandam labi na sa sektor sa agrikultura ug irigasyon, tungod kay gilauman ang posibleng kakulang sa tubig sa mga lugar nga nagasalig sa pagpanguma.
Matod niya, dili na bag-o ang El Niño sa nasud, busa andam na ang Department of Agriculture sa konkretong mga pamaagi aron masulbad dayon ang mga problema nga mahimo niining madala.
Dugang pa niya nga nagkahiusa na ang lain-laing ahensya sa gobyerno.
Ang Department of Agriculture nagmando na sa ilang mga opisina sa mga rehiyon nga bantayan ang mga lugar nga delikadong maapektuhan ug magpatuman og angay nga mga lakang base sa kasinatian sa miaging El Niño.
Ang mga suportang ahensya sama sa Philippine Rice Research Institute ug Bureau of Soils and Water Management nagpadayon usab sa pagmapa sa mga uma nga nagasalig sa ulan ug irigasyon aron magamit sa husto nga pagpangandam.
Sa laing bahin, ang Philippine Atmospheric, Geophysical and Astronomical Services Administration miingon nga adunay 92 porsyento nga posibilidad nga motumaw ang usa ka moderate hangtod kusog nga El Niño.
Ang ubang climate models nagpasidaan usab sa posibilidad sa usa ka “super” El Niño nga mahimong makapakunhod pag-ayo sa ulan ug makapabug-at sa suplay sa tubig sa nasud.
Photo Courtesy : PNY Periodico
