Patay ang usa ka lalaki human kini makasimhot sa bagang aso gikan sa gidaubang mga sagbot sa gihinluang luna nga ilang napalit kauban ang asawa niini, Abril 26, 2026 pasado alas-3 sa hapon.
Subay sa report sa Panabo City Police Station, nakadawat og tawag ang estasyon gikan kang Tommy Dayagro, hingkod ang pangidaron, minyo, pag-umangkon sa biktima kinsa nagpahibalo sa iyang nadiskubrehan.
Giila ang namatay nga si alyas Santi, 59-anyos, minyo, driver, residente sa R. Castillo St., Brgy. Agdao, Davao City.
Sumala sa imbistigasyon, kauban sa biktima ang asawa sa maong higayon kinsa nanghinlo sa area ug nagdaob og mga ugang sagbot, diin daling mibaga ang aso hinungdan sa tumang pag-ubo sa biktima. Daling mibiya ang asawa sa lugar ug wala na kini nakabalik ug nadiskubrahan na lamang sa pag-umangkon sa maong sitwasyon ang nagbuy-od nga patay’ng lawas dapit sa naugang suba.
Sa dugang pagpanubay sa otoridad, walay natalang foul play sa maong insedente ug nagtuo ang kaparentihan nga natural nga kamatayon ang hinungdan sa iyang pagpanaw sanglit aduna kini ginahambin nga balatian nga sa asthma.
Gidala gilayon kini sa Funeral Home sa Bunawan Davao City alang sa post mortem examination ug autopsy.
Photo Courtesy : EMCARE
