Padayon nga nakakuhag dungog ang Team Philippines sa gawas sa nasud, pinaagi sa pagsungkit og medalya human makakuha og silver medal ang women’s sprint team samtang nakasulod usab sa quarterfinals ang Alas Pilipinas beach volleyball squads sa ika-6 nga Asian Beach Games nga gipahigayon sa Sanya, China.
Nakab-ot ni Jessica Rose Laurance ang silver medal uban sa iyang kauban nga sila Shane Joy Ponce, Lianne Diana Pama, ug Olympian Kristina Marie Knott sa women’s 4×60 meter relay nga gipahigayon sa Phoenix Island.
Sumala pa ni Laurance malipayon ug wala sya nagtoo gumikan gusto lang niini malingaw ug magduwa sa iyahang hobbies nga na-andan. Una nang nakakuha si Laurance og bronze medal sa women’s 60meter sprint niadtong milabay’ng adlaw.
Sa kasamtangang medal tally, aduna nay tulo ka gold, duha ka silver, ug duha ka bronze ang Team Philippines, nga nagbutang kanila sa ikatulong puwesto sunod sa China ug Thailand.
Ang kampanya sa delegasyon ginasuportahan sa Philippine Olympic Committee (POC) ug Philippine Sports Commission (PSC).
Sa women’s beach volleyball, gidaog nila Sunny Villapando ug Grydelle Matibag ang Sri Lanka duo nga sila Shehani Ashanga Wattelage ug Ktl Alawaththage sa Round of 16. Mosunod nilang atubangon sa quarterfinals ang Japanese pair nga sila Matsumoto Ren ug Matsumoto Non.
Samtang, nakasulod usab sa quarterfinals sila Khylem Progella ug Sofiah Pagara human mapildi ang Kazakhstan duo nga sila Yekaterina Ryukhova ug Kristina Karimova, ug andam na silang moatubang sa koponan sa Thailand sa sunod nga hugna.
Photo Courtesy : GMA
