Nalakip na sa legal nga aksyon ang matod pa paglapas sa bank secrecy ug data privacy, human gipahibalo ni Manases Carpio, nga magpasaka siya og reklamo batok sa pipila ka opisyal sa gobyerno.
Lakip sa iyang ireklamo sila Bangko Sentral ng Pilipinas Governor Eli Remolona Jr., Anti-Money Laundering Council (AMLC) Executive Director Ronel Buenaventura, House of Representatives committee on justice chairperson Batangas Rep. Gerville Luistro, ug lain pang tulo ka legislators, tungod sa giingong pagpagawas sa sensitibong bank records.
Sumala ni Carpio, ang maong mga rekord protektado ubos sa Anti-Money Laundering Act, Bank Secrecy Law ug Data Privacy Act of 2012, ug dili unta kini pwede ipagawas bisan unsang paagi.
Gibutyag niya nga ang maong isyu dili lang pagdepensa sa iyang asawa nga si VP Sara Duterte, kundili pagpanalipod usab sa integridad sa banking system ug sa publiko.
Gialigahan usab ni Carpio nga gi-leak sa Anti-Money Laundering Council ug House committee ang mga pribadong transaksyon nga gilangkuban sa insurance, investments ug uban pang bayronon, nga giingong gigamit sa pamolitikal nga propaganda.
Samtang, gikonsiderar sa kampo sa Bise Presidente ang pag-apela sa Supreme Court of the Philippines kalabot sa gi-flag nga confidential expenses nga mokabat og Php73 milyon base sa Commission on Audit.
Sa laing bahin, gipahayag usab sa ubang magbabalaod nga walay igong katungod ang House committee sa pag-utingkay sa bank accounts, tungod kay ang impeachment proceedings magsugod pa lamang kon madangat na kini sa Senado.
Photo Courtesy: Inquirer.net
