Nakurat ug nalingaw ang TV host nga Drew Arellano sa iyang pagbisita sa Siargao human niya masinati ang trending nga “human drone” nga pamaagi sa pagkuha og video.
Sa latest episode sa Biyahe ni Drew, nakaila si Drew kang Giovanni, usa sa mga nagpasikat sa nasabing estilo. Sa maong pamaagi, dili na kinahanglan og mahal nga drone kay ang cameraman mismo ang molihok ug maglihok-lihok samtang nag-video gamit lang og cellphone.
Sumala kang Giovanni, naglakip sa ilang mga galaw ang “wide” o paglayo sa subject, “jump,” “barrel roll” o paglibot sa camera, ug “ballerina” nga murag nagsayaw og ballet.
Matod pa niya, nagsugod lang kini isip binuang uban sa iyang mga kauban niadtong 2021 hangtod nga nadani ang mga turista ug nahimong uso sa isla.
Si Drew, misulay usab sa maong teknik aron makita kung makapasar ba siya isip “human drone,” nga maoy nakapalingaw sa mga manan-aw.
Padayon karon nga ginadagsa sa mga turista ang Siargao dili lang tungod sa surf spots, kundili usab sa mga talagsaong paagi sa pag-capture og mga travel videos.
