Miangkon ang Commission on Elections (Comelec) nga manginahanglan kini og dugang pondo kon matuman ang plano sa pagsibog sa skedyul sa Barangay ug Sangguniang Kabataan Elections (BSKE).
Nahitabo kini taliwala sa mga sugyot sa pipila ka sektor nga ipostpone una ang eleksyon tungod sa epekto sa krisis sa Middle East.
Sumala kang Comelec Chairman George Erwin Garcia, bisan pa man og 85 porsyento na silang andam, wala silay mahimo kon ang Congress of the Philippines na ang magdesisyon sa pagsibog sa eleksyon nga gitakdang ipahigayon karong Nobyembre 2.
Gipamahayag usab ni Garcia nga kon mapadayon ang postponement, mangayo pag-usab sila og dugang pondo aron matabunan ang mga gastuhan sama sa bag-ong rehistrasyon, pagdugang sa mga presinto, kagamitan, balota, ug bayad sa mga magtutudlo nga magserbisyo sa eleksyon.
Matod pa niya, mahimong moabot sa tulo ka bilyong piso ang dugang nga pondo nga gikinahanglan kon ipatuman ang reset o pagpaliban sa BSKE.
Photo credits: newsko
