Gibutyag ni City Councilor Pipoy Dizon nga nakapasa na og resolusyon ang konseho kabahin sa pag-abli pag-usab sa Mount Apo, ug kini nahisgutan na usab sa committee meeting nga gipangulohan ni Councilor Evangelista, Chairman sa Environment Committee.
Apan, sumala niya nga napending ang maong resolusyon tungod sa kawalay presensya sa representante sa Protected Area Management Board (PAMB), nga maoy adunay dakong papel sa pagdesisyon sa maong isyu.
Gipasabot ni Dizon nga base sa ilang resolusyon, nakarecover na og igo na ang forest ecosystem sa Mt. Apo ug nakaabot na sa sufficient recuperation.
Dugang pa, mikunhod na usab ang risgo sa wildfires ug nahuman na ang gikinahanglang safety thresholds alang sa regulated human activity.
Gipadayag usab niya nga dako ang suporta gikan sa lain laing sektor nga mokabat sa 35 ka miyembro sa Kidapawan City Tour Guides, 250 ka miyembro sa Mt. Apo Porters Association, ug 100 ka miyembro sa hotel, resort ug restaurant associations ang nagpadala og resolusyon nga nagaapelar sa pag-abli pag-usab sa bukid.
Matod pa ni Dizon, grabeng naapektuhan ang ilang panginabuhian tungod sa dugay nga pagsira sa Mt. Apo, nga nakaresulta sa pagkunhod sa ilang kita.
Tungod niini, napugos ang lokal nga gobyerno sa paghatag og tabang pinansyal pinaagi sa supplemental budget aron masuportahan ang mga apektadong tour guides ug porters sa temporaryong pamaagi.
Photo Courtesy: Wikipedia
