Miduso og reklamo sa kapulisan ang usa ka babaye batok sa iyang bana ug upat ka umagad. Giila kini nga si Lavika Gupta, residente sa Gaur City Avenue-1 sa central Noida.
Sumala sa iyang reklamo, gilimbongan siya sa pamilya sa lalaki aron mapugos siyang magminyo niadtong Enero 16, 2024.
Giingon ni Lavika nga iyang bana nagpakaaron-ingnon nga hitsuraan ug adunay buhok, apan sa dihang gihubo ang wig, nasayran niyang opaw diay kini. Base sa First Information Report (FIR) nga na-file sa Bisrakh police station, dili lang hitsura ang gitago sa lalaki kundili usab ang iyang edukasyon ug kahimtang sa kinabuhi.
Matod pa sa babaye, ang biodata sa iyang bana nag-ingon nga kini nakahuman og Bachelor of Commerce, apan ang tinuod, Grade 12 ra diay ang nahuman. Gipasangil usab nga bakak ang giingong sweldo sa lalaki nga 1.8 milyones nga Rupees o mga $20,000, nga dili diay tinuod sumala sa reklamo.
Tungod sa mga saad ug impormasyon nga iyang gituohan, mitugot si Lavika nga makigminyo. Dugang pa, sa iyang akusasyon, giingon sa babaye nga gipugos siya sa iyang bana sa pag-smuggle og marijuana gikan sa Thailand padulong sa India.
Padayon karon ang imbestigasyon sa kapulisan kabahin sa maong reklamo ug sa mga alegasyon batok sa bana ug sa iyang pamilya.
Photo Courtesy: Padra Clinic
