Mikunhod og dako ang krimen sa Central Visayas sa pagsugod sa 2026, sumala sa Police Regional Office sa Central Visayas (PRO-7), nga nagpasidungog sa ilang “peace and order operational formula” isip yawe sa maong kalamboan.
Sa datos nga gipresentar ni Police Col. Leoncio B. Baliguat Jr., officer-in-charge sa Regional Operations Division, mikunhod og 26.26 porsyento ang kaso sa walo ka focus crimes, gikan sa 438 ka insidente niadtong Enero hangtod Pebrero 2025 ngadto na lang sa 323 sa samang panahon karong tuiga.
Ang maong report gipadayag atol sa unang quarter meeting sa Regional Peace and Order Council (RPOC) sa Central Visayas. Labing dako ang pagkunhod sa kaso sa pagpanglugos nga miubos og 62.24 % gisundan sa pagpatay nga mikunhod og 39.13 % ug physical injury nga niubos usab og 18.56 %.
Sumala pa sa PRO-7, tanan nga walo ka focus crimes nakarekord og pagminus. Gawas sa mga operasyon, gihingusgan usab sa PRO-7 ang kahinungdanon sa presensya sa kapulisan sa komunidad.
Hangtod sa Marso, aduna nay 293 ka functional elevated police outposts nga gipahimutang sa mga urbanisado ug daghang populasyon nga lugar sa rehiyon. Dugang pa, nagdeploy usab ang PRO-7 og 141 ka drone units aron palig-onon ang ilang kakayahan sa air domain security.
