Napriso og kapin lima ka bulan tungod sa “kaparehas og nawong”. Sa Tennessee, ang usa ka 50- anyos nga babaye nga si Angela Lipps, kinsa gidala sa pulis nga wala niya mahibaloan kong unsay rason.
Ang hinungdan? Giingong parehas siyag nawong sa suspek gamit ang facial recognition software!
Ang mas kataw-anan—ug medyo hadlok—wala pa gyud siya kaadto sa North Dakota diin nahitabo ang krimen. Ug matod pa niya, wala pa gani siya kasuway og sakay og eroplano—pero gi-plane ride pa siya padulong didto aron ipriso.
Base sa imbestigasyon, gigamit sa mga otoridad ang AI aron tukion ang suspek sa bank fraud. Pero imbis sakto, kaparehas sa nawong sa babaye ang resulta nga sama sa “copy-paste” ang nawong.
Matod pa sa iyang abogado, kung AI lang ang basihan, dapat gyud usisahon pag-ayo—kay dili tanan parehas og nawong, parehas na dayon og sala. Human mapamatud-an nga layo kaayo siya sa lugar sa krimen, gihunong ang kaso ug gipagawas si Lipps.
Ang istorya kini nga kasinatian mga kajuander, nagpakita sa peligro nga pagsalig sa teknolohiya nga wala’y hustong pag-verify. Bisan pa og makatabang ang AI sa pag-ila sa mga kriminal, dili kini perpekto ug mahimong makadaot sa inosenteng tawo kung masayop.
Ang hustisya kinahanglan magpabilin nga patas ug maampingon, ug dili dapat ibutang lamang sa teknolohiya ang desisyon. Importante ang kritikal nga pagtan-aw, imbestigasyon, ug respeto sa katungod sa matag tawo, aron malikayan ang sayop nga paghukom ug kadaot sa inosente.
Photo courtesy: The Independent
