Gipahibalo sa kadumalahan sa Housing and Resettlement Office (HRO) Iligan ngadto sa publiko nga usa sa mga nag-unang programa nga gitutukan sa Lokal nga Pangagamhanan sa dakbayan sa Iligan alang sa tuig 2026 mao ang pagtiwas sa mga proyekto sa pabahay alang sa mga nabiktima sa bagyong Sendong, ilabi na kadtong mga survivor nga hangtod karon wala pa gyud makapahimulos og permanenteng puluy-anan.
Kahinumduman nga una nang gitakda sa Department of Social Welfare and Development o DSWD nga bawion na unta ang nahabiling pondo nga gitagana alang sa mga Sendong survivor.
Apan tungod sa paningkamot ug hangyo sa amahan sa syudad napabilin ang nasangpit nga budget aron magamit sa mga benepisyaryo nga wala pa gyud maka-avail og permanent housing.
Sumala kang Reynaldo Roque, Head sa Housing and Resettlement Office kaniadtong tuig 2025, mipirma og Memorandum of Agreement ang Lokal nga Kagamhanan pinaagi ni Iligan City Mayor Frederick Siao ug ang DSWD Region-10 alang sa pagpatukod og mga pabalay alang sa mga Sendong survivor sa Barangay Upper Hinaplanon.
Ang proyekto ipatuman ubos sa Core Shelter Assistance Program (CSAP) sa DSWD. Samtang kahibaloan ang maong proyekto gigahinan og mokabat sa 5.5 million pesos.
