Pabalik na sa normal ang supply sa tubig sa Illigan City, human sa pagkuso-kuso sa bagyong Basyang, pinaagi sa padayon nga pagpaningkamot sa Iligan City Waterworks System (ICWS).
Sumala kang Engr. Hubert G. Reyes, Executive sa ICWS, usa sa grabeng naapektuhan mao ang linya sa Tubod diin naigo ang 12-inch nga iron pipe ubos sa Tubod Bridge. Apan sa dali nga responde sa ilang team, napahuman ang repair sulod lamang sa lima ka oras.
Ang main line paingon sa Mahayahay ug Poblacion naibalik usab sa normal human sa bagyo, ug wala nay naobserbahang pagbaha sa mga dalan. Sa Barangay Mahayahay, daghang linya sa tubo ang naputol ug nasudlan sa lapok. Kinahanglan pa kining limpyohan pinaagi sa vacuum operations, nga nakapahinay sa proseso sa pagrepair.
Bisan pa man, napahiuli na ang kadaghanan sa serbisyo, adunay pipila ka bahin nga giadtuan tungod sa mga reklamo sa water leakage sa dalan.
Ang ICWS nagdawat og mga reklamo sulod sa 15 hangtod 20 minutos ug nagserbisyo gikan Lunes hangtod Sabado. Samtang nagpadayon ang rehabilitasyon, nagpadagan usab ang ICWS og duha ka water tank aron matabangan ang mga lugar nga kulang pa sa suplay, sama sa bahin sa Mahayahay ug palibot sa Iligan City National High School.
