Gipadayag sa Provincial Government sa Zamboanga del Sur ang pag-convene sa Provincial Price Coordinating Council (PPCC) aron magpadayon gihapon sila sa pagmonitor sa presyo sa mga produktong petrolyo sa mga Gas Station, bisan pa man walay lokal nga opisina ang Department of Energy (DOE) sa probinsya.
Sa press conference gibutyag ni Board Member Atty. Michelle Espina-Villanueva, nga bisan layo ang DOE, magtrabaho gihapon kini inubanan sa mga lokal nga ahensya ug law enforcement aron mapatuman ang mga regulasyon sa gobyerno.
Dugang pa, ni Board Member Espina, ang publiko pweding mag-report kun adunay nahibal-an nga gas station nga nag-hoard ug usab overpricing sa krudo pinaagi sa eGov app sa gobyerno, pinaagi sa paghatag og detalye ug mga ebidensya aron matagaan kini og hustong aksyon sa DOE.
Giawhag usab sa opisyal ang publiko nga magpabiling alerto ug motabang sa pagreport sa bisan unsang iregularidad sa presyo sa produktong petrolyo.
Pinaagi sa paningkamot sa PPCC ug suporta sa katawhan, gilauman nga maprotektahan ang interes sa mga konsumidor ug mapabilin ang patas nga pagnegosyo.
Photo Courtesy: PIA Western Mindanao
