Misaka na sa 415 ka gasolinahan ang nagsira sa tibuok nasud, sumala sa Philippine National Police (PNP). Kini taliwala sa pagsaka sa presyo sa krudo nga resulta sa nagpadayong tensyon sa Middle East.
Pinakadaghan ang nagsarang gasolinahan sa Cordillera Administrative Region nga adunay 78, gisundan sa Cagayan Valley nga adunay 50, Central Luzon nga may 42, CALABARZON nga may 35, ug Bicol Region nga adunay 30. Sumala sa PNP, adunay kapin 14,000 ka gasolinahan sa nasud nga ilang ginamonitor.
Gipadayag usab nga adunay tulo na ka kaso nga naipasaka may kalabutan sa overpricing, hoarding ug profiteering sa mga produktong petrolyo sa pipila ka lugar lakip ang Nueva Vizcaya, Eastern Samar ug Albay.
Samtang niini, gipakusgan sa PNP ang ilang presensya sa mga gasolinahan, fuel depots ug uban pang kritikal nga imprastraktura aron mapugngan ang ilegal nga mga kalihokan ug masiguro ang padayon nga suplay sa mga batakang serbisyo.
Photo Courtesy: Business Insider
