Nakigtambayayong ang Department of Education (DEPED) Region 9 kauban sa Local Government Unit (LGU) aron mapapaspasan ang pagtukod sa mga kakulangon nga mga classroom sa Zamboanga Peninsula Region.
Matod ni DEPED 9 Assistant Regional Director Dr. Gregorio Cyrus Elejorde, CESO V, ubos sa bag-ong palisiya ang DEPED 9 maoy maghatag sa pondo, disenyo ug standard sa pagahimoong classroom, samtang ang mga LGU maoy moproseso sa procurement ug magpatuman sa actual construction.
Gisaysay ni Dr. Elejorde, tumong sa panagtambayayong aron mapaspasan ang pagtubag sa kakulangon sa classroom nga maoy hinungdan sa shifting schedule ug siksikan nga klase sa pipila ka tulunghaan.
Sumala ni ARD Elejorde, pinaagi sa paghatag og mas dako nga papel sa LGU, mas dali ang implementasyon ug malikayan ang mga proyekto nga dili mahuman.
Sa pagkakaron nagpadayon ang koordinasyon tali sa DepEd ug mga LGU alang sa pag-ila sa mga prayoridad nga eskwelahan nga pagatukoran sa bag-ong classroom sulod ning tuiga.
