Ginatun-an karon sa lokal nga panggamhanan sa Cagayan de Oro, pinaagi sa Price Coordinating Council ang pag-establisar og kaugalingong bantay presyo aron nga mamonitor ang paglihok sa presyo sa mga batakang produkto partikular na ang pang-agrikultura.
Sa programang “Inyong Konseho Karon”, gipadayag ni Konsehal George Christopher Goking, nangulo sa komitiba sa trade and commerce ug miyembro sa Price Coordinationg Council nga kamulo na sila karon sa paglihok pinaagi sa kooperasyon sa ubang buhatan sa syudad alang sa pagplastar sa data-base ug information system niini nga inisyatiba.
Tumong sa bantay presyo sa mga batakang palalitan dili lang aron nga maprotektahan ang mga konsumante ug mamalitay sa pag usab-usab sa presyo sa mga palaliton ug pagsiguro na sab sa kalidad niini nga mga produkto.
Lakip gipunting ni Konsehal Goking nga matun-an ang gidaghanon sa mga produktong gi-produce mismo sa lokal ug mga produkto nga nidagsa sa syudad gikan sa nagkadaiyang probinsya ug rehiyon aron malikayan ang pagkadaot niini.
Photo courtesy: CDO Price Coordinating Council
