Nagbayanihan nalang sa pagmugna og kalsada ang mga lumad ilawom sa tribong Higaonon nga nanimuyo sa Sinunop Ancestral Domain human gidid-an nga maka-agi sa luna nga kasamtangang gidumala karon sa Pelaez Ranch.
Sumala pa ni Datu Jemelito Llaban IPMR sa Sinunop Ancestral Domain nga ang ilang gihimong dalan maggikan sa Sitio Santa Cruz paingon sa Sitio Camansi sa Barangay FS Catanico tungod daghan gihapon kanila ang dili makaagi sa dalan nga gihikaw sa Pelaez Ranch.
Nihimo nalang silag aksyon labi pa nga taliwala sa negosasyon tali tribo ug sa Pelaez Ranch, nga gipatungaan sa lokal nga panggamhanan, wala gihapon silay nadawdaw.
Nagtukmod sa tribo niini nga lakang aron nga dili mabalda ang ilang panginabuhi-an, trabaho ug pag-eskwela sa mga kabataan. Padayon sab ang ilang panawagan nga mahatagan og kasolbaran ang ilahang suliran ug dili mahikawan diha sa ilang katungod sa yutang kabilin.
