Nagdumili sa pag-apil ang Vatican sa “Board of Peace” nga gipangulohan ni US President Donald Trump aron pagdumala ug rekonstruksyon sa Gaza. Gikumpirma kini ni Vatican Secretary of State Cardinal Pietro Parolin. Gipatin-aw sa Kardinal nga dili makigbahin ang Holy See sa board tungod sa iyang particular nature.
Sa dihang gipangutana mahitungod sa partisipasyon sa Italy isip usa ka observer sa Board of Peace, niingon si Cardinal Parolin nga adunay pipila ka mga punto nga medyo makapahibulong, ug adunay mga kritikal nga isyu nga angay pang maresolba.
Usa sa mga gipasiugdahan ni Cardinal Parolin, kung hisgutan ang international level, ang United Nations (UN) lang ang angay nga modumala sa mga crisis situation. Matod pa niya, usa kini sa mga punto nga ilang gibarugan.
Una niini, kapin sa 25 ka nasod na ang nagpahibawo nga moapil sa Board of Peace, apan adunay pipila ka mga nasod ang nibalibad sa imbitasyon ni Trump, lakip na ang New Zealand, United Kingdom, Germany, ug France.
Sa laing bahin, nagpadayag usab og kabalaka ang Vatican Secretary of State mahitungod sa gubat sa Ukraine, pipila ka adlaw sa dili pa ang ikaupat nga anibersaryo sa pag-ulbo sa gubat tali sa Ukraine ug Russia karong Pebrero 24.
Matod niya, hangtod karon wala pa’y nahimo ang isigka-habig sa Ukraine ug Russia nga bisan unsang tinuod nga lakang padulong sa kalinaw human ang upat ka tuig.
Photo courtesy: Kremlin/Wikimedia
