Giduso sa National Food Authority (NFA) ang pag-usab sa mga guidelines sa rice auction o ang pagpasubasta sa mga bugas sa NFA.
Gitinguha sa ahensya nga aprobahan sa NFA Council ang ilang sugyot nga pakunhuran ang kasamtangang limit nga 5,000 ka sako ngadto na lang sa 3,000 ka sako alang sa mga bulto sa bugas nga ipasubasta.
Matod ni NFA Administrator Dr. Larry Lacson, tumong niini nga sugyot nga makasalmot ang mas daghang mga kooperatiba ug mga retailers sa rice auction.
Gipasabot sa opisyal nga mireklamo ang pipila ka mga kooperatiba tungod sa taas nga minimum limit kay dili nila kini makab-ot tungod sa limitadong kapasidad sa panalapi sa mga kooperatiba ug asosasyon.
Gawas sa mga kooperatiba, nagpadayag usab og suporta ang daghang mga traders gikan sa nagkalain-laing bahin sa nasod sa plano nga paubsan ang minimum limit. Sa pagkakaron, wala pa’y desisyon ang konseho bahin niini apan una na kining gisugyot sa NFA.
Ang NFA Council gilangkuban sa NFA Administrator, Secretary of Finance (DOF), Secretary of Trade and Industry (DTI), kalihim sa Department of Economy, Planning, and Development (DEPDev), Governor sa Bangko Sentral ng Pilipinas (BSP), representante gikan sa Office of the President (OP), ug uban pa. Nagsilbing chairperson sa konseho ang Secretary of Agriculture (DA).
Photo courtesy: Department of Agriculture
