Usa ka babaye sa Russia ang nahimong viral sa social media human siya mipadayag nga nagpa-ilis siya og kolor sa iyang mata samtang buntis, aron matod pa matawo nga parehas og kolor sa iyang bag-ong mata ang iyang anak.
Sumala sa babaye nga usa ka cosmetologist, nagpa-procedure siya aron mahimong asul ang iyang mata, kay nagtuo siya nga ang DNA sa bata “maka-adjust” ug mosunod sa iyang bag-ong hitsura.
Apan daghang netizen ang wala motuo, ug imbes motambag, gihimo hinuon og kataw-anan ang comment section.
Usa ka netizen miingon, “Nagpa-laser hair removal ko aron ang akong anak matawo nga walay balhibo.”
Samtang ang usa pa miingon, “Nagtuon ko og German aron ang akong anak kahibalo na daan mosulti pag-anak.”
Bisan pa sa kataw-anan nga reaksyon sa publiko, ang mga eksperto nagpasabot nga ang mga cosmetic procedure dili makausab sa genes sa bata, ug ang kolor sa mata gihapon magdepende sa heredity sa ginikanan.
Busa mga kajuander, klaro nga dili tanan trend sa social media ang angay tuohan — labi na kung DNA na ang hisgotan.
Photo courtesy: Hespress English
