Gipalapdan sa Department of Education (DepEd), ang mental health ug anti-bullying services sa mga pampublikong tulunghaan pinaagi sa Kaagapay Program, nga nagtumong sa pag-apil sa mga ginikanan ug guardians sa pag-atiman sa mga estudyante.
Base sa DepEd Memorandum No. 002, s. 2026, ang mga ginikanan gikonsiderar nga co-educators nga nagtabang sa pagpalig-on sa values formation, positibo nga disiplina, ug kaayohan sa estudyante sa panimalay agig suporta sa mga programa sa eskwelahan.
Matod ni Education Secretary Sonny Angara, mas mapalig-on ang suporta sa mga estudyante kung magtinabangay ang mga pamilya ug eskwelahan sa paghulma sa pamatasan ug pagsabot sa mga kasinatian sa mga batan-on.
Anaa sa Php100 milyones ang gigahin alang sa pagpatuman sa programa sa tibuok nasod, lakip na ang parent engagement sessions ug advocacy campaigns aron mahubad ang mga polisiya sa eskwelahan ngadto sa praktikal nga aksyon sulod sa pamilya.
Kauban sa Kaagapay, ang Php2.9 bilyon nga School-Based Mental Health Program gipatuman usab pinasikad sa Republic Act No. 12080, nga nagmando sa pagpalig-on sa serbisyo sa mental health ug pagpugong sa paghikog sa mga eskwelahan.
Pinaagi sa Kaagapay, gisiguro sa DepEd nga ang mga ginikanan dili lang tigpaniid kondili aktibong kaabag sa pagmugna og luwas, matinabangon, ug inklusibo nga palibot alang sa mga estudyante.
Photo Courtesy: DepEd
