Gipasiugda sa Lokal nga Panggamhanan sa Tagum pinaagi sa City Health Office (CHO) ang kamahinungdanon sa pag-atiman sa panglawas, mental ug emosyonal nga kaayohan pinaagi sa pagpahigayon og Self-Care and Wellness Activity niadtong nakalabay nga adlaw.
Ang maong kalihokan kabahin sa pagsaulog sa World Mental Health Day nga gisaulog matag Oktubre 10, nga nagtumong sa paghatag og panahon alang sa pagpahulay ug pag-atiman sa kaugalingon, ilabina sa mga health worker nga padayong nagserbisyo sa komunidad. Niadtong Oktubre 9, gipahigayon ang pampering session alang sa mga kawani sa CHO, diin naglakip kini sa libreng pagpagupit, manicure ug pedicure nga gitampo ni City Councilor Leo Revita.
Gihatagan usab ang mga health worker og pisikal ug rehabilitasyon nga serbisyo pinaagi sa Balik Sigla Program aron masuportahan ang ilang kahimsog ug kaayohan samtang nagpadayon sila sa pagtuman sa ilang mga responsibilidad.
Samtang niadtong Oktubre 10, gipahigayon ang Caring for Carers Activity, diin 38 ka pasyente ang nakadawat og mga serbisyo nga may kalabotan sa hygiene ug wellness. Nagpasalamat usab ang LGU-Tagum sa Dr. Wong’s Soap ug Taisho Pharmaceutical isip mga kauban sa programa nga mitampo aron mapalambo ang maong kalihokan.
Pinaagi sa maong inisyatiba, gipasiugda sa LGU-Tagum ang importansya sa pag-atiman dili lamang sa pisikal nga kahimsog, kondili lakip usab ang mental ug emosyonal nga kaayohan sa mga health worker ug pasyente.
