Padayon ang kampanya sa pagbakuna sa mga kabataan pinaagi sa programa nga Bakuna Eskwela, nga nagtumong sa pagpalig-on sa panglawas sa mga estudyante ug pagpanalipod kanila batok sa nagkalain-laing mga sakit.
Gipahigayon ang maong kalihokan sa New Corella Central Elementary School SPED Center niadtong Oktubre 19, 2026, nga gipangunahan sa mga Barangay Health Workers o BHW sa Poblacion, sa pakigtambayayong sa Municipal Health Office sa New Corella.
Kabahin sa maong programa ang pagbakuna sa mga estudyante sa Grade 1 batok sa measles, rubella, tetanus ug diphtheria, samtang ang mga babayeng estudyante sa Grade 4 gihatagan usab og bakuna batok sa Human Papillomavirus o HPV.
Pinaagi sa maong inisyatiba, gipalapdan ang kahigayonan sa mga estudyante nga makadawat og proteksyon batok sa mga sakit nga mahimong makaapekto sa ilang kahimsog ug paglambo.
Gipasiugda usab ang kamahinungdanon sa koordinasyon tali sa mga health worker, eskwelahan ug mga ginikanan aron maseguro nga ang mga kabataan makadawat sa gikinahanglang bakuna isip kabahin sa preventive healthcare.
Gilaoman nga pinaagi sa padayong pagpatuman sa Bakuna Eskwela, mas mapalig-on ang kahibalo sa komunidad bahin sa pagbakuna ug ang pagpanalipod sa panglawas sa mga kabataan.
Photo Courtesy: Bayan ng New Corella
