Napalgan ang patayng lawas sa usa ka 49-anyos nga lalaki sa Malasila River sa Barangay La Esperanza, Tulunan, Cotabato, niadtong nakalabay nga adlaw.
Giila ang biktima nga si Edgar Nosillas Solangon, residente sa Purok 3,B sa nahisgutang barangay.
Sa taho, pasado alas 6:15 sa buntag, nakita sa mga residente ang lawas nga nagbuy-od ug naglutaw-lutaw sa tunga sa suba ilawom sa tulay nga nagsilbi nga utlanan sa M’lang ug Tulunan. Gi-report dayon nila sa police station ang insidente.
Base sa igsuon sa biktima nga si Condrado Solangon, katapusang nakit-an nga buhi si Edgar niadtong sayong bahin sa Enero 9 ning kasamtangan nga tuig.
Samtang daling miresponde ang mga personahe sa Municipal Disaster Risk Reduction and Management Office (MDRRMO) aron makuha ang lawas gikan sa sapa.
Sa inisyal nga imbestigasyon sa Tulunan Police Station walay klarong timailhan sa samad o foul play sa lawas sa biktima. Hinuon, padayon pa ang makuting imbestigasyon aron masuta ang eksaktong hinungdan sa iyang kamatayon.
