Gikwestyon ni Senator Rodante Marcoleta ang kalit nga pagdako sa confidential funds sa Office of the Secretary sa Department of Justice (DOJ) atol sa budget deliberation para sa pondo sa ahensya sa umaabot nga tuig.
Gipakita ni Marcoleta ang datos diin niadtong 2023, ang confidential fund sa DOJ mitongtong og ₱526 milyon; sa 2024, kini mikunhod sa ₱168 milyon; apan karong 2025, mitaas kini ngadto sa ₱1.5 bilyon o 800% nga pagsaka sa pondo.
Mitubag si Senator Sherwin Gatchalian, nga sponsor sa DOJ 2026 budget, mao ang Kongreso nga nagdugang og kapin ₱1 bilyon alang sa confidential funds sa DOJ.
Lakip sa rason sa pagtaas sa pondo mao ang kainit sa mga imbestigasyon sa mga Nawala na sabungero ug sa mga isyu sa POGO, maong gikinahanglan og mas dako nga alokasyon ang DOJ aron mas mapalawom ang ilang mga kaso.
Para sa musunod nga tuig, nangayo og dugang budget ang DOJ alang sa confidential funds tungod sa daghang ongoing investigations, lakip na ang mga anomalya sa flood control projects ug ang Witness Protection Program, nga nagkinahanglan og ₱500 milyon.
Gi-rekomenda ni Marcoleta, nga tapyasan sa tunga ang confidential funds sa DOJ para sa 2026, ug ibalhin ang makaltas nga pondo ngadto sa Office of Alternative Dispute Resolution, nga nagatabang sa pagresolba sa mga kaso nga pwede pa masulbad sa gawas sa korte.
Photo courtesy: Wikipedia.org
