Gihatagan ni United States President Donald Trump og deadline si Ukraine President Volodymyr Zelenskyy hangtod Nobyembre 27 aron dawaton ang 28-point peace plan nga gimugna sa administrasyon sa US.
Gipasabot ni Trump nga dili pa kini ang “final offer,” apan naglaum siya nga pinaagi sa maong plano, mahuman na ang gubat tali sa Ukraine ug Russia. Apan, nagpahayag og kabalaka ang mga lider sa Europa, Canada, ug Japan kabahin sa peace plan, ilabi na ang mga isyu bahin sa pag-usab sa teritoryo o border, ug ang paglimit sa armed forces sa Ukraine. Bisan pa man, giila gihapon sa uban nga ang plano usa ka mahinungdanon para sa usa ka hapsay ug malungtarong kalinaw.
Sa karon, gikatakda nga magkita ang mga security officials gikan sa Britain, France, Germany, US, ug Ukraine sa Geneva, Switzerland aron hisgutan ang maong isyu.
Sa iyang social media post, gibutyag ni Zelenskyy nga gidayeg nila ang paningkamot ni Trump ug sa iyang grupo sa pagbalik sa seguridad sa Europa.
Sa laing bahin, gipahibalo sa US officials ang ilang mga kaalyado sa NATO nga gilauman nilang motuo ug mosugot si Zelenskyy sa kasabutan sa umaabot nga mga adlaw.
Photo credit: BBC
