Nakaangkon ug samad bun-og sa lawas ang usa ka motorista human kini nalambigit sa disgrasya tali motorsiklo ug bao-bao sa Nasa, National Highway Brgy. Dahican, Mati City, Davao Oriental pasado alas 4:00 sa hapon, Dominggo, Nobyembre 23, 2025.
Gikalambigitan ang aksidente tali sa usa ka Honda TMX nga motorsiklo nga gimaneho sa usa ka lalaki ug residente sa Tarragona, Davao Oriental ug usa ka bao-bao kolo pula nga gimaneho usab sa usa ka lalaki, hamtong ang pangidaron.
Matod pa sa nakasaksi nga sa wala pa nahitabo ang insidente nagsubay ang duha sa susamang direksyon apan pag-abot sa lugar sa nahitaboan, giingong kalit nga mi u-turn ang bao-bao sa wala nga bahin ug nabanggaan kini sa nagsunod nga motorsiklo. Tungod sa kakusog sa impact, nalabay ang motorsiklo ug ang driver niini rason sa pagkaangkon ug samad sa ulo ug sa iyang tuo nga kamot.
Dali usab miabot sa area ang mga personahe sa Mati PNP uban sa mga sakop sa rescue team ug mihatag gilayon ug medikal nga attensyon sa biktima ug dali usab kining gidala sa pinakaduol nga balay tambalanan alang sa dugang pagtambal.
Sa pagkakaron ang driver sa bao-bao uban sa mga nalambigit nga sakyanan anaa na sa kustodiya sa Mati City Police Station alang sa tukmang disposisyon ug dugang imbestigasyon.
