Gipadeport na sa Bureau of Immigration (BI) ang 23 ka mga Chinese nationals nga nalambigit sa mga aktibidad sa illegal Philippine Offshore Gaming Operators (POGO) ug cyber fraud niadtong Sabado, Nobyembre 22, 2025.
Matod ni Alexi Val Arciaga, hepe sa BI’s deportation and implementation unit nga ang mga langyaw misakay sa Philippine Airlines flight niadtong Biyernes sa buntag ug paingon sa Shanghai Pudong International Airport.
Kahibaloan nga ang deportasyon nunot sa bag-o nga pagpatuman sa Anti-POGO Law, nga gipirmahan sa Presidente niadtong Oktubre 23 nga nagpahamtang ug mas estrikto nga mga silot ug nagpalig-on sa otoridad sa pagpasira sa mga illegal gaming hubs ug uban pang operasyon maykalabutan sa scam.
Gipadayag usab ni BI Commissioner Joel Anthony Viado nga ang pagpalupad sa 23 ka mga deportee nagpamatuod pag-usab sa determinasyon sa administrasyon nga limpyohan ang nasud sa mga langyaw nga nalambigit sa ilegal nga kalihokan nga nagtumong usab kini nga pakusgon ang pagsumpo sa mga ilegal nga offshore gaming operators ug mga sindikato nga kriminal nga nalambigit sa mga langyaw.
Sumala usab sa BI nga ang bag-ong balaod naghatag ug dugang gahum sa mga ahensya sa pagpatuman sa balaod aron mahukman o masulbad ang mga krimen nga maykalabotan sa offshore gaming ilabina ang human trafficking, cyber fraud ug ilegal nga trabaho.
Photo Courtesy to: PNA
