Nakasakmit ang Bureau of Customs (BOC) ang duha ka container van nga puno sa smuggled nga frozen chicken gikan sa China nga nagkantidad og Php12.96 milyon.
Ang mga kargamento miabot sa Manila International Container Port ug gideklarar nga naglangkob lamang sa mga processed food sama sa fish ball. Apan sa inspeksyon sa mga opisyal sa BOC, nadiskobrehan nga ang sulod niini kay frozen chicken gikan China, nga ilegal ubos sa Anti-Agricultural Smuggling Act.
Gituohan nga gigamit sa mga smuggler ang gitawag nga “layering technique,” diin ang mga kahon sa outer layer napuno sa processed food, samtang ang mga kahon sa sulod adunay smuggled nga frozen chicken.
Sumala ni BOC Assistant Commissioner Vincent Philip Maronilla, nailhan na ang tag-iya sa kargamento ug padayon karon ang imbestigasyon sa mga posible pang kaubanan niini.
Si Senador Kiko Pangilinan, nga miuban sa operasyon sa BOC niadtong Lunes, mipahayag nga dili lamang peligro sa kahimsog ang maong shipment, apan usa usab kini ka hulga sa lokal nga industriya sa manok.
Gipasabot ni Pangilinan nga bawal ang pagpasulod sa manok gikan sa China tungod sa hulga sa bird flu ug kung kini makasulod sa merkado, posible kining makaapekto sa lokal nga sektor sa poultry.
Source: ABS-CBN NETWORK
Photo Courtesy to:Inquirer.net
