Gitubag sa Malacañang ang mga pahayag ni Davao City Rep. Paolo “Pulong” Duterte kalabot sa Armed Forces of the Philippines (AFP) Chief of Staff Gen. Romeo Brawner Jr. kalabot sa paggamit sa mga missile gikan sa Estados Unidos.
Matod ni Palace Press Officer Undersecretary Claire Castro, dili angay nga sabotahe-on ni Duterte ang tinguha ni Pangulong Ferdinand Marcos Jr. nga mapalig-on ang puwersa sa kasundalohan pinaagi sa AFP modernization program. Giklaro ni Castro nga ang pagpalig-on sa AFP dili aron mang-una sa giyera kundili aron maprotektahan ang nasud ug malikayan ang mga hulga gikan sa gawas.
Gidugang niya nga ang modernisasyon sa militar usa ka lakang aron mas mapalig-on ang depensa sa nasud ug malikayan ang kahuyang nga nasinati sa miaging administrasyon sa pag-atubang sa mga isyu kalabot sa agresyon sa China sa West Philippine Sea.
Gi-awhag usab ni Castro ang pamilya Duterte nga magpahayag kung adunay mga Pilipinong mangingisda o miyembro sa Coast Guard nga naapektuhan sa mga aksyon sa China sa dagat, ug dili lang kung may kalabotan sa Estados Unidos o sa AFP.
Kaniadtong Domingo, si Philippine Coast Guard spokesperson Commodore Jay Tarriela misaway usab sa mga pahayag ni Duterte nga iyang gitawag nga makabahin ug makapahuyang sa depensa ug alyansa sa Pilipinas uban ang Estados Unidos.
SOURCE: ABS CBN NETWORK
