Nagkasinabot si Presidente Ferdinand Marcos Jr. ug ang bag-ong napili nga punong ministro sa Japan nga si Takaichi Sanae sa usa ka kasabotan sa depensa nga magtugot sa ilang armadong kusog nga magbayloay sa mga suplay ug serbisyo.
Ang maong kasabotan nahitabo atol sa ilang labing unang bilateral nga miting niadtong Domingo, Oktubre 26 sa sidelines sa 47th ASEAN Summit sa Kuala Lumpur, Malaysia.
Ang kasabotan sa duha ka nasud gitawag nga Acquisition and Cross-Servicing Agreement (ACSA) nga mag-streamline sa koordinasyon ug resource-sharing tali sa duha ka militar atol sa mga ehersisyo, humanitarian mission ug uban pang mga operasyon. Kalabot niini, gibutyag sa Presidential Communications Office nga gipasiugda ni Marcos ang relasyon sa depensa sa Japan, ilabina ang trilateral nga kooperasyon sa Pilipinas–Estados Unidos–Japan.
Samtang, misaad usab si Takaichi nga padayon ang suporta niini alang sa pagpalambo sa kalig-on sa ekonomiya ug imprastraktura sa Pilipinas ingon man sa mga plano nga makatabang sa pagpauswag sa seguridad sa pagkaon sa nasud nga pinaagi sa post-harvest rice processing equipment.
Photo Courtesy to:PIA
