Naglusad ang Davao Oriental Police Provincial Office (DOPPO) ug OPLAN KAHAYAG o (Kabataan Atimanon, Hatagan ng Atensyon kay Yang Anak, Gasa sa Ginoo) niadtong Oktubre 25, 2025 didto sa DOPPO Compound, Brgy. Dahican, Mati City, Davao Oriental.
Ang kalihokan gipangunahan ni PCOL RITCHIE S BUCOL, Provincial Director, uban sa Acting Chief sa Police Community Affairs and Development Unit (PCADU) ingon man sa Women and Children Protection Desk (WCPD) ug sa Mati City Police Station.
Misalmot sa maong aktibidad ang amahan sa dakbayan sa Mati nga nagsilbing Guest of Honor ug Speaker ug mihatag ug mensahe ngadto sa mga batan-on ug mga partisipante.
Nasayran nga mukabat sa kinatibuk-ang 50 ka mga batan-on nga nag-edad og 10 ngadto sa 17 anyos ang mitambong nga gikan sa lain-laing barangay sa dakbayan. Tumong sa maong programa aron nga mapugngan ang pag-apil sa mga kabatan-onan sa supak sa balaod nga mga kalihokan ingon man ang paghatag kanila sa usa ka serye sa mga kalihokan nga nakapunting sa pagporma sa mga mithi, disiplina, ug pakiglambigit sa komunidad.
Kalabot niini, adunay gipahigayon nga mga lektyur kabahin sa paglikay nga malambigit sa illegal drugs, mga sesyon sa pagbawi sa moral ug mga kalihokan sa pagsuporta sa pagpasig-uli aron nga mahatagan ug giya ang mga kabatan-onan alang sa pagtukod sa ilang mas hayag nga kaugmaon.
