Nagkadaghan karon ang mga sari-sari store nga naggamit og e-wallets aron mapalambo ang ilang operasyon ug maserbisyohan ang panginahanglan sa mga konsumidor, base sa taho sa technology startup nga Packworks.
Sa survey nga gihimo sa kompaniya nga naglakip sa kapin 2,000 ka sari-sari store owners sa tibuok nasud, gibutyag nga katunga sa mga mitubag nakasinati og 75 porsiyento nga pagtaas sa paggamit og e-wallets gikan Enero hangtod Agosto ning tuiga.
Ang uban pang mga tindera nakasinati usab og dako nga pagtubo, diin 20% sa mga mitubag ang nakarekord og 100% increase, laing 20% ang adunay 50% nga pagtubo, samtang 10% ang nagtala og 10% nga pagtaas.
Matod sa Packworks, ang mosaka nga paggamit sa e-wallets hinungdan sa pagtaas sa consumer demand, diin ang mga kostumer naggamit na niini sa pagpalit og paninda, pag-access sa pondo, ug pagbayad sa bills sa ilang mga suking tindahan.
Base sa datos sa kompanya, 40% sa mga tag-iya sa tindahan ang naggamit og e-wallet alang sa in-store payments, 30% alang sa bill payments, ug laing 30% alang sa cash-in ug cash-out transactions.
Nakapaayo usab kini sa kita sa mga sari-sari store, diin 13% sa mga tag-iya ang nag-ingon nga ang ilang e-wallet income kaparehas na sa ilang kita sa physical goods. Dugang pa, 66% sa mga tindahan ang nagkuha og 20% sa ilang revenue gikan sa e-wallet transactions, samtang 21% ang nag-ingon nga 10% sa ilang kinatibuk-ang kita gikan gihapon niini.
Sa tanang mitubag, 85% sa mga sari-sari store owners ang nagagamit sa GCash alang sa ilang negosyo, samtang 15% ang naggamit sa Maya. Aron mas mapadako ang ilang kapasidad sa transaksyon ug matubag ang paspas nga panginahanglan sa kustomer, daghang sari-sari store karon ang naggamit og hangtod lima (5) ka e-wallet accounts.
Sumala ni Hubert Yap, chief platform officer sa Packworks, ang paggamit sa digital tools sama sa e-wallets nagtabang sa sari-sari stores nga mapalapad ang ilang serbisyo ug mapauswag ang ilang negosyo.
Gidugang pa niya nga gawas sa pagpamaligya og pisikal nga paninda, ang mga tindahan karon nagdiversify sa ilang produkto, nagtanyag og value-added financial services, ug nag-integrate og digital tools aron mapauswag ang operasyon ug mahimong “nano-banks” sa ilang mga kasilinganan.
Matod pa ni Yap, ang resulta sa pagtuon nagpaila sa panginahanglan nga suportahan ang mga micro-entrepreneurs pinaagi sa saktong teknolohiyang pinansyal aron mapuslan nila ang digital nga oportunidad nga nagpadako sa ilang negosyo.
Photo Courtesy: Tekkie Pinas
