Arestado ang usa ka lalaki’ng namaligya og bitin nga Albino Ball Python, sa gikasang buy-bust / entrapment operation sa pagpanguna sa Maritime Police Station (MARPSTA) kauban ang mga personahe sa Carmen Municipal Police Station, ilawom sa Davao Norte Police Provincial Office (DNPPO), ug Department of Environment and Natural Resources – City Environment and Natural Resources Panabo City (DENR-CENRO), sa Prk 7, Brgy. Ising, Carmen, Davao del Norte.
Giila ang suspek nga si alyas Kean, 25 anyos, ulitawo, pest control technician, ug residente sa Prk.7, Brgy. Ising, Carmen Davao del Norte.
Subay sa report sa kapulisan, narekober sa maong operasyon ang usa ka box nga dunay sulod nga usa ka Albino Ball Python nga adunay gibana-banang kantidad nga Php5,500, usa (1) ka genuine Php500 bill nga buy-bust money, lima (5) ka piraso nga machine copy sa Php1000 bill ug usa ka cellphone.
Kalapasan sa Section 27 (e) sa Republic Act 9147 kon Wildlife Resources Conservation and Protection Act of 2001 ang nakatakdang atubangon sa maong suspek.
Sa pagkakaron, anaa na sa kustodiya sa Davao Del Norte MARPSTA ang suspetsado alang sa dugang dokumentasyon ug tukmang lakang samtang ang halas nga ball python, anaa na sa kustodiya sa DENR-CENRO Panabo City alang sa saktong disposasyon.
Photo for illustration credits to: Zen habitats
