Gikabalak-an sa pipila ka sektor ang gisugyot nga P198.45 bilyon nga pondo alang sa Department of Agriculture sa 2027 tungod kay mas ubos kini og P17.25 bilyon o walo ka porsyento kumpara sa P215.69 bilyon nga naaprobahan alang sa ahensya niadtong 2026.
Sumala sa kanhing Agriculture Secretary Leonardo Montemayor, mahimong dakong hulga kini sa seguridad sa pagkaon sa nasod, ilabina tungod sa gilauman nga mas kusog nga epekto sa El Niño ug sa nagpadayong tensyon sa Middle East nga mahimong mopataas sa gasto sa produksyon.
Aron malikayan ang posibleng krisis, gisugyot ni Montemayor nga hatagan og prayoridad ang pagpalig-on sa lokal nga produksyon imbes nga magsalig pag-ayo sa pag-import sa mga produkto.
Matud pa ni Montemayor, ang pagsulod sa daghang imported nga produkto samtang anaa usab sa merkado ang lokal nga ani mahimong makapalisod sa kahimtang sa mga mag-uuma ug magresulta sa ilang pagkalugi.
Nanawagan usab si Montemayor sa Department of Justice nga imbestigahan ug pasakaan og kaso ang mga nalambigit sa agricultural smuggling, nga giingong nakaapekto sa presyo sa lokal nga mga produkto. Segun pa ni Montemayor, ang mga produktong gipuslit o sayop ang deklarasyon dili moagi sa hustong pagsusi ug mahimong magdala og mga sakit nga makadaot sa panglawas sa publiko, gawas pa sa pagkawala sa hustong koleksyon sa buhis sa Bureau of Customs.
Nakasentro usab ang mga kritisismo sa DA sa mga isyu sa pag-import sa pipila ka produkto sama sa monggos, ingon man sa padayong problema sa pagpamuslit ug sayop nga deklarasyon sa sibuyas ug uban pang mga utanon.
