Usa ka retail company sa China ang nakadani og dakong pagtagad tungod sa talagsaong polisiya niini nga gitawag og “unhappy leave,” diin ang mga empleyado mahimong makagamit og hangtod 10 ka dugang nga adlaw nga paid leave matag tuig kon dili sila malipayon, stress, emotionally drained, o dili lang gyud mobati nga andam silang mosulod sa trabaho. Ang kompanya mao ang Pang Dong Lai, usa ka retail chain nga nakabase sa Henan province ug gitukod ug gipangulohan ni businessman Yu Donglai.
Gipaila ni Yu ang maong polisiya niadtong 2024, diin iyang gipasiugda nga ang mga empleyado kinahanglan adunay kagawasan sa pagdesisyon kon kanus-a sila kinahanglan mopahulay. Sumala sa iyang gipahayag, kon dili malipayon ang usa ka empleyado, dili kini kinahanglan pugson nga mosulod sa trabaho. Ang usa pa ka talagsaong bahin sa polisiya mao nga ang management dili mahimong mobalibad sa maong leave request, ug ang pagdumili niini giisip nga paglapas sa internal nga lagda sa kompanya.
Ang “unhappy leave” lahi sa ordinaryong sick leave tungod kay dili kinahanglan nga ang empleyado adunay sakit o maghatag og detalyadong medikal nga rason aron makapahulay. Ang polisiya gitumong sa paghatag og dugang nga panahon alang sa pahulay ug work-life balance. Sumala sa mga report, ang mga empleyado sa kompanya adunay ubang mga benepisyo sama sa regular nga annual leave ug mga adlaw nga walay trabaho panahon sa Spring Festival, nga kabahin sa mas lapad nga workplace policies sa Pang Dong Lai.
Photo courtesy: YourTango
