Gisaulog kagahapong adlawa, Setyembre 28 ang ika-125 nga anibersaryo sa makasaysayanong Balangiga Encounter, diin nagtigom ang mga lider sa gobyerno ug mga residente aron pasidunggan ang kaisog, sakripisyo ug malungtarong panulondon sa mga katawhan sa Balangiga.
Gipangulohan ni Cabinet Secretary Benhur Abalos ang wreath-laying ceremony sa Balangiga Encounter Monument, uban sila Eastern Samar Gov. Ralph Vincent Evardone, Eastern Samar Police Provincial Office Provincial Director PCol. Orlando Gardiola, Vice Gov. Maricar Sison-Goteesan, mga miyembro sa Sangguniang Panlalawigan, Balangiga Mayor Dana Dlynch De Lira, ug uban pang mga opisyal sa lokal nga pagamhanan.
Nagdala sa tema nga “Rediscovering the Balangiga Encounter,” gitumong sa ika-125 nga anibersaryo nga mas mapalalom ang pagsabot ug pagpasalamat sa maong makasaysayanong hitabo ug sa kahulogan niini alang sa mga katawhan sa Balangiga ug Eastern Samar.
Gipasiugda usab sa maong kalihokan ang padayong responsibilidad sa pagpreserbar sa kasaysayan sa komunidad ug pagsiguro nga ang mga sugilanon ug leksyon gikan niini mapasa ngadto sa umaabot nga mga henerasyon.
Photo courtesy: PIA EASTERN SAMAR
