Mipahigayon ang Department of Environment and Natural Resources (DENR) Region 8 og pagpangtanom og kawayan sa Barangay Camansihay, Tacloban City, isip kabahin sa pagsaulog sa Philippine Bamboo Month karong Septyembre.
Miabot sa 300 ka mga partisipante ang miapil sa maong kalihokan, lakip ang mga personahe sa DENR Regional Office 8, PENRO Leyte, CENRO Palo, MGB ug EMB Region 8, Philippine Army, Office of the Vice President–Eastern Visayas Satellite Branch, pribadong kompanya, mga benepisyaryo sa TUPAD ug ang lokal nga pangagamhanan sa Barangay Camansihay. Ang maong kalihokan gipangulohan sa CENRO Palo lakip ang pag-andam sa lugar ug paghatag sa mga punla sa kawayan nga itanom.
Tumong sa kalihokan nga matabangan ang pagpahiuli sa mga tanom ug malikayan ang pagkaanod sa yuta, ilabina sa daplin sa mga suba. Gilauman usab nga makatampo ang kawayan sa pagpakunhod sa epekto sa climate change pinaagi sa pagsuyop ug pagtipig sa carbon dioxide, dugang pa sa paghatag og materyales ug oportunidad sa panginabuhian sa komunidad sa umaabot.
