Gilaumang moatubang karong semanaha isip testigo sa Senate impeachment court si Davao City Mayor Sebastian “Baste” Duterte, atol sa pagpadayon sa impeachment trial batok kang Vice President Sara Duterte.
Gipa-subpoena si Baste aron motestigo may kalabotan sa mga transaksiyon sa Davao City government ug sa GenCorp Industries Incorporated, usa sa mga kompanyang gideklarar ni Vice President Sara Duterte isip business interest sa iyang SALN.
Sumala sa mga rekord sa PhilGEPS nga gipresentar sa hearing, adunay 49 ka government contracts nga gihatag sa GenCorp nga mokabat sa 35.878 million pesos, lakip ang 15 ka kontrata gikan sa Davao City government nga mokabat sa 34.217 million pesos.
Gipunting sa prosekusyon nga may kalabotan kini sa alegasyon sa Article II sa Articles of Impeachment bahin sa unexplained wealth ug sa giingong kapakyasan sa Vice President nga i-divest o isalikway ang iyang business ug financial interests human siya milingkod isip Bise Presidente niadtong 2022.
Samtang, si Baste mismo miingon kaniadto nga wala siya ug ubang opisyal ug empleyado sa Davao City government nahibalo nga gideklarar ni Sara ang iyang interes sa GenCorp. Ang iyang testimonya gipaabot nga makatabang sa impeachment court sa pag-eksaminar sa mga transaksiyon ug rekord nga nalambigit sa maong kompanya.
Gawas kang Baste, gilauman usab ang testimonya ni kanhi senador Antonio Trillanes IV, kabahin sa mga alegasyon kalabot sa gi-report nga kabtangan sa magtiayong Duterte, samtang gipaabot usab ang posibleng pagpresentar sa mga rekord gikan sa Anti-Money Laundering Council.
Photo courtesy: City Government of Davao
