Arestado ang isa ka 47-anyos nga miyembro sang Barangay Peacekeeping Action Team ukon BPAT matapos makumpiska sang kapulisan ang ginapatihan nga shabu kag isa ka .45 caliber nga armas sa Barangay Tran, Lebak, Sultan Kudarat.
Ginpatigayon ang search warrant operation pasado alas-Kuwatro sang kaagahon sang Setyembre 26, 2026, kun sa diin gin-aresto ang suspek nga ginkilala sa alyas nga “June.”
Narekober sa iya puluy-an ang isa ka .45 caliber nga armas nga may lima ka bala, lima ka heat-sealed sachet sang ginapatihan nga shabu, isa ka magazine, kag nagkalain-lain nga drug paraphernalia, lakip ang digital weighing scale.
Ang operasyon ginpangunahan sang Lebak Municipal Police Station, kaupod ang nagkalain-lain nga police units.
Suno kay Police Regional Office 12 Director PBGEN Alan B. Manibog, padayon nga pagapabakuron sang kapulisan ang operasyon batok sa ilegal nga droga kag loose firearms, samtang ginatuman ang proseso sang kasuguan kag ginatahod ang mga kinamatarong sang tagsa ka persona.
Photo courtesy: PNP Police Regional Office 12
