Nasakmit sa Police Regional Office 10 ang gibanabanang usa ka kilogramo nga gituohang shabu nga nagkantidad og 6.8 milyon pesos sa usa ka joint buy-bust operation sa Barangay Indahag, Cagayan de Oro City niadtong Septiyembre 26.
Nadakpan sa operasyon ang 40 anyos nga lalaki nga giila sa alyas “Bebe,” single ug walay trabaho, samtang gipangita pa sa mga awtoridad ang iyang kauban nga giila sa alyas “Abu,” nga nakaikyas sa operasyon.
Sumala sa PRO-10, gipahigayon ang operasyon alas 5:01 sa hapon sa Kamakawan, Barangay Indahag, pinaagi sa RPDEU-10, uban ang mga operatiba gikan sa COCPO, PDEG, Regional Intelligence Units ug PDEA.
Nabawi sa mga operatiba ang 11 ka heat-sealed plastic sachets nga adunay gituohang shabu nga mitimbang og hapit usa ka kilogramo, lakip ang usa ka black chest bag, mobile phone, driver’s license nga gipanagiyahan ni alyas “Abu,” ug 10 mil pesos nga buy-bust money.
Ang nadakpan anaa na sa kustodiya sa Maharlika Custodial Facility, samtang giandam ang kaso batok kaniya tungod sa paglapas sa Republic Act 9165 o Comprehensive Dangerous Drugs Act of 2002.
Ang nakumpiskang gituohang iligal nga droga isumiter sa Regional Forensic Unit 10 alang sa laboratory examination, samtang padayon ang imbestigasyon ug pagpangita sa laing suspek.
Photo Credit to: PRO-10
